پنج شنبه، ۲۷ مهر ۱۳۹۶

نارگیله – بیرینجی حصه

«الف – آذری»

نارگیلهجعفر، بارماقلاری یانان‌کیمی، اؤزونه گلدی. پاپریز کؤتوگونو کول قابیندا ازیشدیریب، سؤندوردو. گؤزلری تاقچا ساعاتینا ساتاشاندا گؤردوکی، ۱۲ـ‌یه آزجا قالیر. آجی ـ آجی گولومسه‌دی. اوره‌گیندن کئچدی:

ـ گؤر نه واختداندیر فیکیر عالمینده‌یم. بو آرواد قویماییر آدام اؤز دردینه قالسین. آتماجالارینی آتیر، سونرادا اوزانیب یاتیر. سؤزونون نه آغینی یوخلاییر، نه‌ده قاراسینی. هارادان گلدی تولازلاییر. بیر دئمه‌ییر بو یازیق کیشی‌نین هئچ نه‌یی اولماسادا، باری آزاجیق دوزلوگو وار. الی اؤزگه‌لر جیبینده دئییل…

سونرادا دریندن آه چکیب، فیکیرلشدی:

ـ آرواددیر دا… نه بیلیم بلکه‌ده حقلی اولسون. گؤز گؤرور، اوره‌ک ایسته‌ییر. منیم‌ده‌کی الیم بوش، جیبیم ییرتیق‌دیر. چؤر‌ک‌ده، ماشاللاه اولسون، گیریب داش آلتینا، گؤبک ایسته‌ییر دوشمه‌سین…

***

گئجه شام واختی‌ایدی. نارگیله، سفره‌نی سالیب، قاب ـ قاشیغی دوزدو. بیر شابایدادا قاتیق آشین اورتایا قوْیدو. احمدایله سارا کوچه‌ده اوشاقلارایله اویناییب آتیلیب ـ دوشدوکلرینه گؤره آجلاریندان ال ـ آیاقدان چیخیب، سس ـ کوی سالاراق، شام ایسته‌ییردیلر.

احمد:

ـ آنا، آنا منیم پاییمی وئر!

ـ آنا اوّل منیمکی، اوّل منیمکی.

سارا قیشقیرا ـ قیشقیرا پیالانی آناسینا ساری توتدو…

نارگیله اوشاقلارین باشینا چیغیریب، آجیقلاندی:

ـ اود پارچالاری، دینمه‌یین گؤروم هله!

اوتاقدان مطبخه دؤنوب، الینده سو بارداغی‌ایله قاییتدی. جعفر ال ـ اوزونو حوله‌ایله قورولایا ـ قورولایا اوشاقلارا باخدی. اونلار میسیب، سفره‌دن قیراقدا دیوارا سؤیکنمیشدیلر. سارا پارلاق گؤزلرینی شابایدادان قالخان آشین بوغونا زیلله‌میشدی.

احمدده آیاق بارماغی‌ایله پالازین دلینمیش گؤزونو ایری‌لدیردی.

جعفر حوله‌نی آسیلقاندان آسلایاراق: «احمد، اوغلوم! آنانین آجیغینی پالازدان نییه آچیرسان.» دئیه، نارگیله‌نین یانیندا بارداش قوروب، اوتوردو. چؤره‌کدن کسیب آغزینا قویدو. کؤزه یئل ووروب کؤزه‌رن کیمی، نارگیله‌نین یاناقلاری پؤرتدو، اوشاقلارین پیالاسینا ایکی چؤمچه آش شاپبیلدادیب، دئیینمه‌یه باشلادی:

ـ بو اوْلدو دوْلاناجاق، بو اوْلدو ایش! بیلمیرم ائو دردی چکیم، بیلمیرم اؤز دردیمی چکیم، بیلمیرم بو اود آپارمیشلارین دردینی چکیم، بیلمیرم…

ـ ایندی‌کی بیلمیرسن نه چکه‌سن، ائله‌ده منیم آش پاییمی چک!

جعفر بونو دئییب گولمه‌یینی بوغازیندا پیققیلداتدی. نارگیله شه‌وه گؤزلرینی جعفرین اوزونه ایری‌لدیب دیللندی:

ـ سن هر نه‌یی شوخلوغا سالیرسان، هر نه‌یی! قولاقلارین اولوب دروازا، سؤز بو یاندان گلیر، اویاندان گئدیر. بس دوننکی سؤزون نه اولدو؟ بازارلیق نه اولدو؟ بوگون‌ده کی گئج گلدین. آی «جعفر آغا قوربانی!» سنین بوگون ـ صاباحین قورتارمادی… یاخشی‌دیرکی همیشه توْیا گئده‌ن دئییلم. واللاه ـ بیللاه قارداشیم اوغلو اولماسایدی گئتمزدیم. آمما نه ائدیم؟ مجبورام. گئتمه‌سم، اوزوم قارداش دانلاغیندا قالار. گئتمه‌سم، بایرامین اوزونه نئجه باخیم! گئتمه‌سم او قیز جیغاز گلین نه دئیه‌ر! داش بئله بی‌بی‌نین باشینا… بودا کی بیزیم اگین ـ باشیمیزدیر، گئدیم نئجه گئدیم؟ فامیل ایچینده آبیریم گئدیر. گئتمه‌ییم نئجه اولسون؟ نئجه اولسون آی جعفر؟

جعفر اؤزونه آش چکیب یئمه‌یه مشغول‌ایدی. چؤره‌کدن کسیب آغزینا قویاراق دئدی: «عصبی‌لشمه نارگیله خانیم! صاباح، باخ صاباح اینشاللاه ایشدن تئز گلرم، گئده‌ریک بازارا. دئییرسن هله بیغلاریمدان بیر تئل قیریب یانیندا گیروو قوْیوم.» سونرادا قاققیلداییب، آرتیردی:

ـ بیرده‌کی، آی «قیرآت»سیز کوراوغلونون شه‌وه گؤز نارگیله‌سی! بوش جیب‌ایله بازارلیق اولماز. بیرآز پالازقولاق لازم‌دیر یا یوخ؟

نارگیله آغزینداکینی اودوب، دئدی:

ـ کرمینه شوکور آللاه. بیلمیرم بو کاسیبلیق نییه بیزیم یاخامیزدان ال چکمه‌ییر. یاغ یاغ اوستونه تؤکولور، یارما یاوان قالیر…

ـ یئنه هانسی بخته‌ورین یاغینا یاغ تؤکولوب آی نارگیله؟

نارگیله عصبی حالدا قاشیغی کاسایا بوراخدی. آیاغا قالخاراق «مرحمت‌دن باشقا کیم اولاجاق!» دئیه ـ اوتاقدان ائشیگه چیخدی.

جعفر کاسانین دیبینی قاشیقلایاراق دئییندی کی:

ـ ایشین، پئشه‌ن اولوب مرحمت، مرحمت! آی آرواد، آدام بیر بئله قارنی قوردلو اولماز! آدام بیر بئله گؤزو گؤتورمز اولماز! قالدی، گئتدی، ایندییه‌جن سنه یوز دفعه دئمیشم آدامین الی اؤزگه‌لر جیبینده اولماسا پولو سامان کیمی سووورا بیلمز. هئی اوتوروب گؤزونو مرحمته تیکمه! آیری قونوم ـ قونشویادا باخ، من مرحمتین اری کیمی اولا بیلمه‌رم، اونون مین جوره اویونو وار. گونده مین کوزه‌یه قولپ قوْیور. ال‌آلتی آشیریب داشیرتماسی وار. آرواد! آغزیمی آچما… سن نه بیلیرسن بخته‌ور مرحمتین اری…

استغفروللاه ـ دئیه ـ سفره‌دن کنارا چکیلدی. نارگیله نه ایسه قاش ـ قاباغینی ساللاییب، داها بیر کلمه‌ده جعفرایله دانیشمادی. بیر استکان چایی‌دا جعفرین قاباغینا ائله‌جه تیپبیلداتدی‌کی، استکان سسله‌نه‌رک چایی ائشیگه داشلاندی. جعفر پیرت ـ پیرت نارگیله‌یه باخیب، اوره‌گینده یاواشجا دئدی:

ـ قاش قاباغینا باخ! یئنه جینلر داغدان گلدی…

سؤزونو اوجادان دئسه‌یدی، آرتیق داوا ـ شاوا اوزاناجاق‌ایدی… نه ایسه کؤنولسوز قندی آغزینا آتیب چایی ایچدی. چای آغزیندا سامان سویونون دادینی وئریردی. پاپریز آلیشدیریب فیکره دالدی. دوزو، بللی دئییل‌ایدی نه‌یه فیکیرلشیردی. فیکرینین کلفچه‌سی دولاشمیشدی. باشیندا مین جوره قیریق ـ قوروق فیکیر اویناییردی. پاپریزی پاپریز کؤتوگوایله آلیشدیریردی.

«آردی‌وار»

درباره روزنامه سرخاب

روزنامه سرخاب

همچنین ببینید

تبریز، شهر بدون گدا

گداپرور نباشیم!

چون ادعای تبریز شهر بدون گدا در گوش آفاق پیچیده است به خاطر همین روی …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

Watch Dragon ball super